Оскуола күнэ

Сэтинньи 13 күнүгэр, Д.Ф. Алексеев төрөөбүт күнүгэр, үгэс быһыытынан сэттис сылын оскуола күнэ бэлиэтээтибит. Бу күммүт үөрүүлээх линейкаттан саҕаланна. Оскуола директора Атласова У.П. учууталлары, үөрэнээччилэри үөрүүлээх күнү көрсө бүтүн Россиятааҕы бастакы педагогическай маастарыстыба күрэҕин үрүҥ көмүс призерун, технология учуутала Васильев И.И., Чуумпу океаннааҕы Азиятааҕы норуоттар икки ардыларыгар ыытыллыбыт эдэр чинчийээччилэр конференцияларын боруонса призерун Избекова Настяны, улуустааҕы WorldSkills күрэх кыайыылаахтарын астынан туран бэлиэтээтэ. Нэһилиэк аҕа баһылыга Жирков В.г. оскуола үөрэнээччилэригэр, учууталларыгар эҕэрдэ тылларын анаата, оскуола бастыҥ выпускниктарын үтүө холобурдарыгар олоҕуран үөрэнэргэ-үлэлииргэ сорук туруорда. Д.Ф. Алексеев кэргэнэ, оскуола ветеран учуутала Галина Георгиевна 1Хомустаах ыччата үөрэххэ дьулуурдаах, олоххо активнай позициялаах буоларыгар, куруутун инники күөҥҥэ сылдьарыгар ыҥырда. Бу күн иккис аҥарыгар оскуола иһинэн «Инникигэ хардыы» научнай-практическай конференциянан түмүктэннэ. Уопсайа 3 секциянан 29 оҕо чинчийэр үлэлэрин истэн, интириэһинэй темаларга кэпсэтии таҕыста, оҕолорго сүбэлэр бэрилиннилэр. Кыайыылаахтар сэттинньи 28 күнүгэр улууска ыытыллар «Инникигэ хардыы» научнай-практическай конференцияҕа оскуола, нэһилэик чиэһин көмүскүү барыахтара.

Стручкова Т.П., директоры үөрэх чааһыгар солбуйааччы

Добавить комментарий